مفيش ام مبتقفش في المطبخ , و لو عندها اطفال صغيرين فاكيد مش هيسيبوها في حالها و هيفضلوا عايزين يقفوا معاها , و لازقين فيها زي البطة و عيالها كده

عشان كده لازم يبقي في احتياطات ناخد بالنا منها و ننفذها في مطبخنا , خصوصا كمان ان الاطفال بتبقي عايزة دايما تقلد اللي بيشوفوه من مامتهم و عايزين يساعدوها ,

و عشان نخلي تجربة الوقوف في المطبخ مع ولادنا و بناتنا مقتصرة علي البيت و بس , و مش كل الجيران اللي في العمارة سامعنها و عايشينها معانا ,

ففي شوية افكار نحب نقولك عليها

اول حاجة و اهم حاجة هي الاشراف المستمر علي الاطفال داخل المطبخ , مينفعش نسيبهم لوحدهم -

خلينا نستخدم عيون البوتاجاز البعيده دايما اللي ناحية الحيطة مش القريبة لايد الاطفال , خصوصا لو بنقلي حاجة -

لو في اي اواني سخنه سايبينها لازم تكون في اخر عمق الرخامة مش علي الطرف , و لو الاواني دي ليها مقابض نقلبها ناحية الحيطة -

اي سكاكين او ادوات حادة زي المقص او المبشرة ...الخ , لازم تكون محطوطة في مكان بعيد عن ايد الاطفال , ده مهم جدا ل سلامة الاطفال في المطبخ عشان نتجنب الحوادث المنزلية -

مواد التنظيف الكيمايئية المستخدمة في تنظيف الاواني او التنظيف عموما بلاش نحطها تحت الحوض , التجربة اثبتت ان الاطفال بيعرفوا يفتحوا اي حاجة , مهما اشترينا اقفال امان الاطفال -

ارض المطبخ لازم تبقي مفروشة بسجاده حتي لو قديمة, عشان نقلل من فرص انهم يتزحلقوا و يقعوا و يتصايوا لا قدر الله-

بعد ما حاولنا نامن البيئة المحيطة في المطبخ

لازم نشوف هنتعامل مع اطفالنا ازاي في المطبخ

لان الاطفال دايما بيقلدوا , لازم نشتريلهم ادوات طهي امنة زي العاب المطبخ البلاستيكية و يستخدموها في وجودهم في المطبخ كانهم بيطبخوا معاكي -

نخصص لهم مكان امن بعيد عن البوتاجاز , يقدروا يبقوا قاعدين فيه و في نفس الوقت مشاركينك اللحظات الممتعه دي , لانهم بكرة هيكبروا و هيوحشك قعدتهم معاكي و حكاويهم عن يومهم في المطبخ و احلامهم و خيالهم -

لازم نديلهم مهام خفيفة في المطبخ لان ده بيعزز ثقتهم في نفسهم و بيبني شخصيتهم , مهام خفيفة زي غسيل الخضار و الفاكهة , العجن , تزيين الاكل ...الخ -

و في الاخر

بالتخطيط الجيد و الاشراف نقدر نخلي المطبخ مكان ممتع و امن لاطفالنا و نقوي علاقتنا بيهم و نصنع ذكريات بتعيش للابد